Saathvan

पिकलेले  केस दिसतात .. पिकलेल्या फळाचा सुगंध नाही जाणवत ? माझ्या भोवती .. ?

असंच असावं नातं आपलं , मृगजळ जणू , प्रपंचातलं .... थकलं भागलेलं , मन  शिणलेलं , निववून टाकेल , जळ इथलं .... कधीही  यावं , सुख  मागावं , दुःख  सांगावं , अंतरातलं .... मुक्त हसावं , सुख शिंपावं , चिंब  भिजावं , मन आपलं ... असं मृगजळ , आरसा नितळ , आनंदाचं तळं , मन आपलं ......

जय गणेश ... सूर उल्हासाचा  , गंभीर सूर श्री चा , सूर तेवतोय ज्योतीसारखा , ज्योती  स्थिर स्वरासारखी .... सुगंधी  धूम्रवलय , तानपुऱ्याचे  स्वरवलय , तालाची  मंद्र लय , आत्म्याचा विलय .... सुरांची रंगत , संवादिनीची संगत , भारावले जगत , करी गणेशाचे स्वागत ....

अंतर  तर  नाही  पडलंय आपल्यात .. मग ते सारे  शब्द  कुठे गेले ? गंध दरवळतोय इथे आसपास , मग बकुळफूल कुठे लपले ? आत्ता आत्ताच  तर , तू  दिलेले रंग इथे  सांडले .. ते  घेऊन  आलेले फुलपाखरू ,  कुठे  बरं  दडले ? अजून  तुझ्या शब्दांचा भाव , लहरतोय माझ्या मनी , सांग , त्यांना खुलवणारे , चांदणे कसे  विरघळले ? जा कुठेही , अस  कुठेही , मी काहीच  नाही  विसरले .. तुझ्या  प्रीतीचे  मुग्ध गीत , अंतरात आहे जपलेले .....